Hoe om nuwe liefde te laat blom

Daryn’s Gym se Deon Coetzee en Natasha Sutherland verklap hoe hulle karakters nuwe liefde laat blom in hierdie splinternuwe Brett Michael Innes-komedie.

Hulle was ’n gewilde paartjie in Egoli en nou kry Deon Coetzee en Natasha Sutherland weer na baie jare kans om die liefde te laat blom in regisseur, Brett Michael Innes, se nuwe fliek Daryn’s Gym. Ons het ’n bietjie meer gaan uitvind oor hulle karakters en wat hulle raad is om liefde in nuwe verhoudings te laat seëvier.

VERTEL ONS MEER VAN DIE VERHOUDING TUSSEN PAUL EN STARLA?
Deon: “Paul was ’n jare lange vriend van Daryn Jnr se pa. Daar was nog altyd ’n lekker vonk tussen Paul en Starla en na Daryn Snr. se dood het dit verder gebroei. Paul was nog altyd bang om ’n kans op liefde te waag, maar Starla het dit verander.”
Natasha: “Ek dink nie ek moet te veel van die storie weggee nie. Maar dit tema van die fliek is tweede kanse en dit gee tog hoop… iets wat ons baie van nodig het in hierdie moeilike tye.”

HOE WAS DIT OM NA AL DIE JARE WEER TEENOOR MEKAAR TE SPEEL?
Deon: “Dit was ’n absolute plesier. Natasha is een van die mees vreeslose aktrises saam met wie ek nog gewerk het. Sy is oop vir enige voorstelle en ons respekteer mekaar geweldig in ons professionele lewens. Ons werk regtig vreeslik lekker saam en die feit dat sy pragtig is, is net ’n bonus.”
Natasha: “Dit was soveel pret vir ons om weer saam te werk en ek voel daar is ’n spesiale sinergie tussen Paul en Starla. Om na soveel jare weer saam te kon werk, was vreeslik spesiaal en dat ons nou soveel meer lewenservaring het om te deel.”

WATTER RAAD HET JY VIR JONG VERLIEFDES OM DIE LIEFDE TE LAAT BLOM?
Deon: “Moenie kwaad gaan slaap nie. Moenie besluite neem wanneer jy emosioneel is nie.”
Natasha: “Ek dink nie ek is die regte een om raad te gee hier nie. Lesse oor die liefde is iets wat elkeen van ons persoonlik moet leer teen ons eie tempo.”

HOE WEET JY DAT JY DIE EEN ONTMOET HET?
Deon: “Ek dink nie jy is ooit 100% seker nie. Die gut-feel wat jy het is natuurlik die barometer, maar dit kan ook ’n “stukkende een” wees. So ek weet nie regtig nie. Maar ek dink dit is wanneer daar ’n vonk is tussen julle en dit nie iets is waaroor jy nodig het om te dink nie.”
Natasha: “Wanneer iemand in die spieël en in hulle hart kan kyk en vir hulleself kan sê dat die persoon regtig die een is. Dis makliker gesê as gedaan, maar ek dink as ons so na as moontlik kan kom aan selfaanvaarding, kan ons begin om gesonde verhoudings met ander te hê.”

WAT IS JOU RAAD VIR ’N GESONDE VERHOUDING?
Deon: “Byt vas, respekteer mekaar en dink voordat jy doen of praat.”
Natasha: “Moenie druk op mekaar sit om die een te wees nie en moenie verwag dat iemand anders jou moet kom red van jou seer… of om dit vir iemand anders te doen nie.”

HOEKOM MOET MENSE DARYN’S GYM KYK?
Deon: “Dit is ’n goedvoel-fliek en is verfrissend en nuut. Ek dink wat Brett gedoen het, is baanbrekerswerk en die kamma-dokumentêre styl is al baie in reekse gebruik, maar nog nie regtig in flieks nie. Die redigering en draaiboek is briljant.”
Natasha: “Want dis ’n Brett Michael Innes-fliek. Dis vars, lewendig en vol liefde en humor. Dis effens stout, maar het soveel hart en dit is wat ons tans nodig het. Clifford Joshua Young is vreeslik snaaks in die hoofrol en die res van die akteurs speel ook puik toneel.”  
Die fliek is tans op eVOD beskikbaar. Moet dit nie mis nie!

Kyk die lokprent hier!
Written by Troukoors