’n Sterk persoonlikheid skrik dikwels die teenoorgestelde geslag af. Is dit hoekom jy dalk nog enkellopend is? Lees verder om te sien wat RymStoff se Christoff de Beer dink.
In die werkplek is ’n vrou met ’n sterk persoonlikheid, wat haar man kan staan, ’n goeie ding. Maar in ’n verhouding mag dit dalk wees dat die meeste mans verkies om die broek te dra.
RymStoff bestaan uit Christoff de Beer en Raymond Ray. Dié groep se eerste enkelsnit is so bietjie meer as ’n jaar gelede uitgereik en hulle nuwe album verkoop soos soetkoek. Ons het by Christoff gaan hoor of ’n vrou met ’n sterk persoonlikheid hom beïndruk of laat hardloop vir die berge?
WAT IS JOU SIENING OOR DIE VROU SE PLEK IN DIE HUIS?
“Ek sien ’n vrou as ma, rolmodel vir die man asook die lig in die huis.”
HOE SAL JY DIT HANTEER AS JY BY ’N VROU MET ’N STERK PERSOONLIKHEID SOU BETROKKE RAAK?
“Ek is mal oor ’n mooi persoonlikheid, dit maak enige vrou vir my vreeslik aantreklik. Maar in so ’n verhouding sal ek maar net nie myself vind nie. Dis nie vir my nie.”
DIE NUWE VROU, MET DIE STERK PERSOONLIKHEID, IN JOU LEWE STAP IN EN BEGIN JOU PLEK RONDSKUIF. SY BRING VAN HAAR GOED OM HAAR STEMPEL AF TE DRUK – BEERTJIE OP JOU BED, TANDEBORSEL IN DIE BADKAMER, PLANTJIE IN DIE SITKAMER. VERWELKOM JY DIE PERSOONLIK VROULIKE TOUCH OF MOET SY EERDER HAAR HANDE TUIS HOU?
“Ek dink dis baie oulik. ’n Vrou moet ook welkom voel as sy by my moet intrek. Sy moet weet sy is tuis. Los net my man cave uit.”
OMDAT SY SO ’N STERK PERSOONLIHEID HET, BEGIN DIE VROU IN JOU LEWE NAMENS JULLE BESLUITE NEEM. VAL JY IN BY HAAR PLANNE OF PRAAT JY MET HAAR AAN DAAROOR?
“Ek dink ek raak nou oud, want ek verkies dit om tyd saam met haar te spandeer. Ek glo dat paartjies vir mekaar moet tyd maak.”
IS ’N VROU MET ’N STERK PERSOONLIKHEID, WAT OORVAT, VIR JOU AANVAARBAAR OF DIE BEGIN VAN DIE EINDE VAN ’N VERHOUDING?
“Ek dink hoe meer gemaklik julle met mekaar raak, hoe meer vat ’n mens oor.”
HOE BENADER ’N MENS KONFLIK BINNE ’N VERHOUDING, SODAT ALBEI PARTYE GELUKKIG IS MET DIE OMSTANDIGHEDE?
“Raak kalm, praat sag en luister na haar. Hoor wat sy het om te sê. Al is sy verkeerd, sê ook jammer, sodat sy verstaan jy luister na haar.”
NET VIR PRET
BLOND OF BRUNET? “Altwee, sy moet net lekker kan kuier ook!”
HAMBURGER OF SLAAI? “Hamburger!”
KURWES OF SLANK? “Mmmm, ’n paar kurwes natuurlik.”
FLIEK OF DANS? “Ek is mal daaroor om te fliek.”
SWEMBROEK OF BIKINI? “Bikini, veral die nuwe ontwerpe.”
SANDALE OF PLAKKIES? “Plakkies.”
STIL OF SPONTAAN? “Spontaan.”
Artikel: Yolanda Wessels
SOEK JY IETS OM JOU GASTE MEE TE VERMAAK BY JOU TROUE?
