Waterbesparingswenke gaan gewoonlik by die een oor in en by die ander oor uit… maar met die waterbeperkings en boetes wat tans die rondte doen, moet pasgetroude paartjies – wat reeds noustrop trek – mooi te werk gaan om hulle deel vir Moeder Natuur te doen.
Julle is pasgetroud en het onmiddellik ook sommer ’n waterkrisis wat julle moet hanteer om die begroting te laat klop. Water is kosbaar en met die huidige tekort in ons pragtige land sal ons almal ons deel moet doen om by te dra tot waterbesparing. Buiten daarvoor om saam te bad en stort, is daar ook nog ’n paar ander waterbesparingswenke wat julle kan probeer…
’N NUWE MANIER VAN HUIS SKOONMAAK
Dis onnodig om produkte met harde sulfate (die skuimmakende bestanddeel) te gebruik om huis skoon te maak. Middels soos suurlemoene, koeksoda, asyn en teeboomolie kan gebruik word vir huishoudelike take en dit werk net so goed soos seperige chemikalieë. Loer bietjie hier hoe om jou eie skoonmaakmiddels te maak en nog ander waterbesparingswenke te kry.
WATERBESPARINGSWENKE VIR KRANE EN WASBAKKE
* ’n Druppende kraan kan tot 75 liter water per dag mors, so maak seker dat die wassers in werkende toestand is.
* Dit klink vreemd, maar stortkoppe op jou krane kan tot 50% water bespaar.
* Maak die kraan toe terwyl jy jou tande borsel. Op hierdie manier kan 6 liter water per minuut bespaar word.*
* Moenie medisyne, verf of ander gifstowwe in die drein afgooi nie.
* As jy ’n bietjie meer moeite wil doen kan jy ’n voetkraan installeer. Die waterdruk word bepaal deur hoe hard jy op die hefboom trap.
WATERBESPARINGSWENKE VIR DIE STORT
* Sit ’n leë emmer op die stortvloer sodat dit al die water kan opvang terwyl jy wag vir die warm water om deur te kom. Gebruik dan hierdie water vir jou tuin, toilet of huishoudelike take.
* Installeer ’n waterbesparende stortkop. Só kan jy tot 4 liter water per minuut spaar.
WATERBESPARINGSWENKE VIR DIE TUIN
* Lei die tuin vroegoggend of laatmiddag nat. Dit keer dat verdamping plaasvind, wat help met waterbesparing.
* Bad-, was- en skottelgoedwater kan behandel en gebruik word in die tuin. Hier is idees oor hoe om water te filtreer en te hergebruik.
* Onthou om enige stukkende waterpype en watervermorsing te rapporteer by jou plaaslike owerheid.
Met goeie navorsing en toewyding kan elkeen van ons ’n deel bydra tot waterbesparing. Raak kreatief en deel julle waterbesaringswenke met vriende en familie sodat almal kan saamtrek om ons kinders se toekoms te verseker.
Artikel: Gina van Staden
Foto: Huffingtonpost
